Op reis met wyfies

Op reis met wyfies

December 18th, 2014


“Wat wil jy in Oxford gaan maak, Willem?”
Dit is wat almal wil weet.
Wel, ek was nog nooit voorheen daar nie. Sowaar.
En dan is daar die ding met hekse. Noem dit navorsing.
Dit het waarskynlik begin met die heks in Engeland, wat wrintiewaar so wragtigies amper vir Adriaan opgeeet het.
Dit sou ‘n gemors gewees het. En daar is nog ‘n ander heks in my lewe, maar daaroor praat ek nie graag nie. Nie nou al nie.
Hoe dit ook al sy, ek dink ons is amper gereed om te gaan. Nie dat daar enige teken van voorbereidings is nie. Nee, alles is mos elektronies. Vliegkaartjies. Hotelbesprekings. Die bespreking vir ‘n bussie om ons lughawe toe te vat. Elektroniese kaarte, elektroniese boeke om op die lang vlug te lees.
Elektroniese musiek.
Iemand sal ‘n stel onderklere en ‘n tandeborsel een of ander tyd in ‘n sak moet gooi, maar ek sien dit nog nie gebeur nie.
Is ek opgewonde?
Hopla!